मेरो पनि देश छ र ???

 नदीहरु आफै बगेझें 

फूलहरु आफै फुलेझें,

र, चराहरु आफै उडेझें

म पनि जीवित छु धर्तिमा – आफ्नै मौलिक युद्दले । 

मेरो प्रिय देश ! 

र, देश-चालक नायकहरु !! 

इतिहासदेखि वर्तमानसम्म 

म हरपल लडिरहेछु विश्वयुद्ध, 

म जुधिरहेछु आज पनि – 

उत्तरका अग्ला हिउँ-पहाडहरुसँग 

र, कुदिरहेछु तुफान-तुफान -

भूमध्य खाडीका मरुभूमिहरुमा 

यो अनवरत लडाइँमा-

म जिउँदै जमेको छु र, पग्लिएको पनि । 

अपशोच !

म निःशब्द र शान्त छु बुद्ध जस्तै 

मात्र एउटै प्रश्न छ मनमा -

मेरो पनि देश छ र ???